#TimorLeste #UNTL #EmbaixadorCubaihaTL 15 Fevereiru 2021
Universidade Nacional Timor Lorosa'e (UNTL) nia Magnífiku Reitór, Profesór dr. João Soares Martins, hala’o enkontru ho Embaixadór Cuba 🇨🇺 nian iha Timor-Leste, S.E. Sr. Omar Mauro Mareirro, hodi ko’alia kona-ba kooperasaun entre Timor-Leste ho Cuba iha formasaun rekursu umanu ne’ebé konsentra iha área Medisina Jerál nian iha universidade nasionál.
Iha enkontru ne'ebé hala’o iha Sala Vídeo Konferénsia UNTL nian (15/02), Díli, Reitór UNTL nian agradese ba Governu Cuba ne’ebé fó ona apoiu ba Timor-Leste ho kooperasaun ne’ebé kleur ona.
"Agradese ba apoiu husi Cuba nian ne’ebé importante ba formasaun médiku sira, nune’e mós destakamentu médiku cubanu iha Timor-Leste, dezde 2003 to’o 2021 ne’e, kongratula ba ita bo’ot sira-nia asisténsia”, tenik Reitór.
Iha fatin hanesan, Embaixadór Cuba iha Timor-Leste hateten katak kooperasaun ne’e eziste kleur ona, no Governu Cubanu iha planu hakarak kontinua nafatin koopera ho UNTL liuliu formasaun nian.
“Loos duni relasaun entre nasaun rua ne’e eziste kleur ona, ha’u hakarak kontinua kooperasaun ida ne’e, no relasaun ho Universidada Nacional Timor Lorosa’e hodi apoiu Fakuldade Medisina ho nia Kursu Medisina Jerál”, tenik Embaixadór.
Partisipa iha sorumutuk ne'e, Visereitór ba Asuntu Akadémiku i Garantia Kualidade, Profesór Doutór Samuel Venancio Freitas, Visereitór ba Asuntu Estudantíl, Profesora Eng. Lígia Tomas Correia, Proreitora ba Asuntu Kooperasaun, Profesora Doutora Lídia Gomes, SKM, M.D., Xefi Brigada Médika Cubana iha Timor-Leste, Dr. Juan Chaves Godoy, inklui konvidau sira.
Média UNTL 📝: Agostinho da Cruz e Silva
Foto 📷: Althur Ramos (estajiáriu), Agostinho da Cruz e Silva.