UNTL HO ADN DISKUTE KONA-BA KRITÉRIU SIRA BA PROJETU FOUN

Escrito por Mateus Goncalves Visualizações: 552

 ADN3

#TimorLeste #UNTL #ADN 9 Fevereiru 2021

Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D ho Visereitór no Proreitór sira hala’o enkontru ho Diretór Ezekutivu Ajénsia Dezenvolvimentu Nasionál (ADN), Eng. Mariano Renato Monteiro da Cruz, ho nia ekipa, hodi ko’alia kona-ba kritériu sira husi ADN ba Projetu foun ne’ebé atu konstrui iha futuru, iha Sala Vídeo Konferénsia UNTL nian, Díli, (09/02).

Reitór UNTL apresia tebes ho servisu ADN nian, ne’ebé durante ne’e kontrola projetu hotu ho kualidade liuliu projetu sira ne’ebé halo iha UNTL.

“Ha’u apresia tebes servisu ADN nian, tanba halo servisu ho di’ak ba konstrusaun sira ne’ebé mak halo iha ami-nia universidade tanba ho kualidade ne’ebé di’ak no iha futuru, ami hakarak halo kooperasaun di’ak liután atu nune’e bele hadia prosesu dezenvolvimentu institusionál nian foku ba infraestrutura”, dehan Reitór.

ADN1

Iha parte seluk, Diretór AND nian, Eng. Mariano Renato Monteiro da Cruz, hateten katak enkontru ne’ebé hala’o atu habelar papel Ajensia Dezenvolvimentu Nasional nian ba Estrutura foun universidade nian liuliu iha dezenvovimentu Institusional nian.

“Ohin ami ko’alia kona-ba projetu tuan sira (ongoing) no projetu foun sira, tanba ADN nia papel ne’e tenki verifika no sertifika, tan ne’e kritéria lubuk ida mak ami aprezenta ona ba Reitór ho nia estrutura sira atu apar hodi bele submete dokumentu sira ba ami hodi halo verifikasaun antes halo prosesu aprovisionamentu no implementasaun, atu nune’e labele difikulta iha prosesu pagamentu”, tenik DJ ADN.

Diretór ne’e mós propoin atu hatama lalais ona dokumentu kona-ba projetu foun tolu (3) ne’ebé mak atu konstrui tanba presiza tempu atu halo verifikasaun.

ADN2

Partisipa iha enkontru ne’e Visereitór ba Asuntu Administrasaun no Finansas no Administradór Jeral Profesór Doutór Helio A. da C. Xavier, Ph.D, Proreitór ba Asuntu Dezenvolvimentu Instituisional, Profesór Doutór Lelis Gonzaga Fraga, Proreitór ba Asuntu Planeamentu, Monitorizasaun no Avaliasaun Profesór Nelson Salsinha, Ph.D, Diretór Nasional Planu No Finansas, Sr. Egídio dos Santos Filipe, Xefi Departamentu no ekipa UNTL, Adjuntu Januario M. Guterres ho nia ekipa ADN nian.

Média UNTL: Agustinho da Cruz e Silva, Altur Ramos (estajiáriu)
Foto: Agustinho da Cruz e Silva