Magnífiku Reitór, Profesór dr. João Soares Martins, MPH, Ph.D, simu vizita husi S.E. Embaixadór Repúblika Populár Xina 🇨🇳 nian iha Timor-Leste
#TimorLeste #UNTL 05 Fevereiru 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, simu vizita husi S.E. Embaixadór Repúblika Populár Xina 🇨🇳 nian iha Timor-Leste 🇹🇱, Dr. Xiao Jianguo, iha Sala Vídeokonferensia, kampus sentrál UNTL nian, Díli (05/02).
Vizita refere ho objetivu hodi ko’alia kona-ba kooperasaun ne’ebé realiza ona entre UNTL ho Embaixada Xina ne’ebé antes ne’e hala’o tiha ona, no diskute mós pasu kooperasaun ba oin.
“Ohin Embaixadór Xina nian ho ekipa mai atualiza kona-ba kooperasaun entre UNTL no Xina ne’ebé antes ne’e la’o tiha ona, hanesan bolsu estudu ne’ebé implementa kada tinan hodi oferese bolsu estudu interna ba estudante UNTL nian”, tenik Magnífiku Reitór.
Iha biban ne’e, Magnífiku Reitór mós solisita apoiu Governu Repúblika Xina nian, liuhusi Diplomata Dr. Xiao Jianguo, hodi hadia infraestrutura nian hanesan biblioteka, laboratóriu no seluk tan.
Partisipa enkontru ne’e Vise-Reitór ba Asuntu Akadémiku no Garantia Kualidade, Profesór Doutór Samuel Venâncio de Sousa Freitas, Vise-Reitór ba Asuntu Pós-Graduasaun no Peskiza, Profesór Doutór Gabriel António de Sá, Pro-Reitora ba Asuntu Kooperasaun Profesora Doutora Lídia Gomes SKM. MPH, Pro-Reitór ba Asuntu Dezenvolvimentu Institusionál, Profesór Doutór Lelis Gonzaga Fraga, Embaixadór Repúblika Xina nian iha Timor-Leste ho nia ekipa.
Média UNTL 📝 : Leonia de Araújo (estajiária)
Foto 📸 : Agostinho da Cruz