Magnífiku Reitór, Profesór dr. João Soares Martins, MPH, Ph.D
#TimorLeste #UNTL #FMCS 5 fevereiru 2021
ESKOLA SUPERIÓR MEDISINA JERÁL FMCS HALO ABERTURA
BA ATIVIDADE 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, halo abertura ba atividade tinan letivu 2021 nian iha Fakuldade Medisina no Siénsia Saúde (FMCS), nia Eskola Superiora Medisina Jerál, iha Auditóriu Liceu UNTL nian, Díli (05/02).
Iha abertura ne’e Magnífiku Reitór hateten katak atividade tinan letiva foun iha Eskola Superiór Medisina Jerál ne’e hanesan tradisaun ida ne’ebé kada tinan sempre halo antes hahú aula no atividade sira.
“Atividade ne’e hanesan tradisaun ne’ebé sempre halo abertura, no eventu ne’ebé úniku uituan tanba ne’e, iha ha’u-nia diskursu mós enkoraja estudante sira atu estuda di’ak liután, hodi prepara ba futuru médiku ne’ebé kualifikadu”, tenik Reitór.
Iha fatin hanesan Dekanu FMCS nian, Profesór José Dionisio Ximenes hateten, ho orgullu partisipa iha eventu refere no husu ba estudante sira atu iha responsabiliade no estuda hodi lori fakuldade ba oin.
“Nu’udar Dekanu orgullu ho ita boot sira-nia prezensa iha Eskola ne’e, ho ita boot sira-nia dedikasaun ne’ebé makas tebes, hatudu responsabilidade, no integridade tomak hodi hatuur prinsípiu tomak Fakuldade nian ne’ebé mak hala’o iha tempu sira ba kotuk”, tenik Dekanu.
Dekanu FMCS apresia ho Magnífiku Reitór ho nia estrtutura nian prezensa, hodi fó motivasaun ba estudante sira atu aprende ikus mai bele sai médiku di’ak liu iha rai ida ne’e.
Partisipa iha abertura atividade letiva ne’e, Vise-Reitór, Pro-Reitór, Vise-Dekanu, dosente no Estudante sira, S.E. Embaixadór Cuba 🇨🇺 nian iha Timor-Leste, SSr.Omar Mauro Marrero, no Xefe Brigada Médika Kubana iha Timor-Leste, Dr. Juan Carlos Chaves Godoy, no konvidadu sira.
Média UNTL 📝: Laurindo da Cruz (estajiáriu)
Foto 📸: Agostinho da Cruz