#TimorLeste #UNTL 04 Fevereiru 2021
Universidade Nacional Timor Lorosa’e (UNTL) nia Proreitora ba Asuntu Kooperasaun, Profesora Doutora Lídia Gomes, SKM, MPH, hamutuk ho nia ekipa partisipa iha Enkontru Forsa-Traballu ba Programa Formasaun Téknika no Bolsu Estudu, ne’ebé oganiza husi Institutu Nasionál Administrasaun Públika (INAP), iha Salaun Auditóriu INAP, Komoro, Díli (04/02).
Relasaun ho enkontru refere Proreitora hateten katak partisipasaun ne’e importante tebes tanba UNTL mós servisu hamutuk ho Fundu Dezenvolvimentu Kapitál Umanu (FDCH) hodi fó formasaun ba rekursu umanu iha rai laran.
“Enkontru ohin importante tebes tanba UNTL sai hanesan universidade estatál ida, servisu hamutuk ho Fundu Dezenvolvimentu Kapitál Umanu (FDCH) nian ne’ebé Governu kria atu eleva kapasidade ita-nia rekursu umanu liuhusi tékniku administrativu sira nomós ita-nia dosente”, dehan Profesora Doutora Lídia Gomes.
Proreitora mós hatutan katak parte pozitivu ida mak, Governu tau ona formasaun ba kapasitasaun dezenvolvimentu umanu ne’ebé 2021 ne’e tenke sentraliza iha INAP, inklui fiskalizasaun, no avaliasaun ba formandu sira.
Partisipa iha enkontru refere Diretór Nasionál Rekursu Umanu UNTL, Sr. Agostinho Quelo, apoiu tékniku iha UNTL ba FDCH, Sra. Jesuina Maria Mendonça ho nia ekipa, Diretora Ezekutiva FDCH nian, Sra. Leila Cárceres dos Santos, Diretór Jerál INAP, Sr. Agostinho Letencio, Komisáriu Komisaun Funsaun Públika, Sr. António Freitas, no konvidadu sira.
Média UNTL 📝: Leonia de Araujo, Denilson Amandio Barros (estajiáriu)
Foto 📸: Denilson Amandio Barros (estajiáriu)