#TimorLeste #UNTL 04 Fevereiru 2021
Magnífiku Reitór Universidade Nacional Timor Lorosa’e (UNTL), Profesór dr. João Soares Martins, MPH, Ph.D, akompaña husi Visereitór no Proreitór sira enkontru ho Embaixadór Portugal 🇵🇹 nian iha Timor-Leste 🇹🇱, José Pedro Machado Vieira, ho equipa, hodi diskute no atualiza kooperasaun ne’ebé la’o dadaun iha divulgasaun Dalen Portugés no ba futuru.
“Ohin ne’e Embaixadór mai aprezenta-an ba Reitór ho nia estrutura foun kona-ba kooperasaun ho UNTL ne’ebé la’o kleur ona, iha inísiu Universidade ne’e harii, agora ita-nia kooperasaun ho Embaixada Protugal la’o hela hanesan, bolsu estudu husi Instituto Camões, IP no seluk tan”, hateten Magnífiku Reitór iha Sala Vídeokonferénsia UNTL nian, Díli (04-2).
Reitór mós hatutan katak iha diskusaun mós ko’alia kona-ba kooperasaun iha futuru nian, tanba dadaun ne’e iha situasaun COVID-19 atu reforsa no atualiza tuir kondisaun ne’ebé iha.
Iha fatin hanesan, Embaixadór Portugal iha Timor-Leste hateten katak Portugal ho Timor-Leste hanesan nasaun ne’ebé iha lasu-istóriku, iha kultura no amizade nian, la’os atu sai de’it amigu maibé, reforsa nafatin kooperasaun ne’ebé asina ona.
“Portugal ho Timor-Leste iha lasu-istóriku kulturál no amizade, ha’u husu atu konkretiza iha asaun espesífika ligadu ho ita-nia kooperasaun, ne’ebé aposta iha programa ne’ebe assina husi Governu Timor-Leste ba tinan sira oin mai” tenik Embaixadór.
Embaixadór mós hatutan katak edukasaun hanesan prioridade ba sira atu apoiu Timor-Leste liu-liu iha divulgasaun Dalen Portugés, faze ida mais vizível iha kooperasaun liga ba área edukasaun iha nível hotu-hotu inklui Universidade.
Partisipa iha enkontru refere, Visereitór ba Asuntu Akadémiku no Garantia Kualidade, Profesór Doutór Samuel Venâncio de Sousa Freitas, Visereitór ba Asuntu Pós Graduasaun no Peskiza, Profesór Doutór Gabriel António de Sá, Proreitór ba Asuntu Planeamentu, Monitorizasaun no Avaliasaun Profesór José Nelson Salsinha, Ph.D, Adida ba Kooperasaun Embaixada Portugal nian, Dra. Cristina Faustino, inklui konvidadu sira.
Média UNTL 📝: Agostinho da Cruz, Arthur Ramos (estajiáriu)
Foto 📸: Agostinho da Cruz, Moisés do Rego