#TimorLeste #UNTL 3 Fevereiru 2021
Magnífiku Reitór Universidade Nacional Timor Lorosa’e (UNTL), Profesór dr. João Soares Martins, MPH, Ph.D, hamutuk ho nia estrurura, hala’o sorumutuk diagnóstiku ida ho Dekanu, Vise-dekanu, Diretór-Jerál, no Diretór Nasionál hodi diskute kona-ba distribuisaun Orsamentu Jerál Estadu (OJE) 2021 ba kada Diresaun, Fakuldade, no Unidade sira.
“Ita-nia estrutura foun mai, OJE UNTL nian 2021 Governu aprova ona, tanba ne’e mak ita hakarak kria marjen ruma hodi halo distribuisaun ho nune’e ita mós enkaixa ajenda estrutura foun universdiade nian”, tenik Magnífiku Reitór, iha Auditóriu Liceu UNTL nian, Díli (3/2).
Magnífiku Reitór mós agradese ba preokupasaun sira ne’ebé hato’o husi Dekanu Fakuldade sira iha enkontru ne’e hanesan kontribuisaun ho ideia di’ak hodi hadia di’ak liután jestaun universidade nian.
Iha fatin hanesan Diretór Nasional Planu i Finansa (DNPF), Sr. Egidio dos Santos Filipe, hateten katak iha enkontru refere importante tebes ba estrutura foun atu atualiza kona-ba alokasaun OJE 2021 ne’ebé aprovadu ona.
“Enkontru ida ohin importante tebes tanba relasiona ho ita-nia estrutura foun, ita presiza halo sesaun traballu ida ne’e atu bele aprezenta orsamentu 2021, nune’e bele komprende no koñese nia prosesu no planu ezekusaun nian”, tenik Diretór DNPF.
Diretór ne’e espera hotu-hotu entende orsamentu no ezekuta ho efisiénsia no efikasia, tuir ninia dalan sei fó benefísiu ba dezenvolvimentu Universidade Nasionál nian.
Partisipa iha enkontru refere, dirije husi Magnífiku Reitór no estrutura foun Visereitór, Proreitór, Diretór-Jerál, Dekanu, Vise-dekanu, Diretór Nasionál, no Xefe Departamentu sira.
Média UNTL 📝: Agostinho da Cruz, Leonia de Araujo (estajiária)
Foto 📸: Agostinho da Cruz, Denilson Amandio Barros (estajiáriu)