#TimorLeste #UNTL 29 Janeiru 2021
Universidade Nacional Timor Lorosa’e (UNTL) liuhusi Konsellu Jerál realiza “Tomada de Posse” ba Magnífiku Reitór Eleitu, Profesór Doutór João Soares Martins, ho nia estrutura hodi ofisializa mandatu ba tinan lima mai (2021-2026).
Liuhusi diskursu Prezidente Konsellu Jerál UNTL nian, Dr. Aniceto Cardoso Barreto, agradese ba Reitór sesante, Profesór Francisco Miguel Martins, ho nia estrutura ne’ebé konsege lidera ona universidade nasionál.
“Agradese ba Reitór sesante ne’ebé konsege lidera universidade ne’e, ho esforsu tomak durante mandatu, maibé husu atu kontinua apoiu nafatin Reitór foun hodi lori dezenvolvimentu universidade ba hodi garante kualidade no produsaun ba rekursu umanu ne’ebé kompetetivu iha nível nasionál, rejionál no internasionál”, tenik Doutór Aniceto.
Doutór Aniceto hato’o mós ben-vindu ba Magnífiku Reitór eleitu, ne’ebé sei lidera universidade no husu atu kontinua uza rekursu hotu ne’ebé iha, hodi dezenvolve kualidade rekursu umanu ba Timor-Leste.
Iha fatin hanesan, Reitór sesante, Profesór Doutór Francisco Miguel Martins, ho konfiansa katak, Reitór eleitu ho nia ekipa tomak ho maturidade ne’ebé sei lori UNTL, sai universidade ne’ebé sólidu iha lideransa no susesu.
“Ha’u ho estrutura sesante tomak, ohin ofisialmente entrega universidade ba estrutura foun hodi kontinua prosesu dezenvolvimentu universidade nasionál nian ba futuru. Iha mandatu ne’ebé liu ona iha progresu oioin ita atinje, maibé iha dezafiu oioin, tanba ne’e dezeja ho estrutura foun bele kontinua no lori susesu ba UNTL”, hatutan Reitór sesante.
Entretantu, Magnífiku Reitór foun hateten katak loron ida ne’e (29-01) marka istória iha viajen universidade nian iha mudansa lideransa no dezenvolvimentu institusionál UNTL nian.
“Antes hato’o pasu ida ba oinsá, hakarak agradese ba Profesór Francisco Miguel Martins ho estrutura ho lideransa no dedikasaun ne’ebé lori universidade ne’e iha situasaun difísil, ligadu ho situasaun polítika nasaun nian, maibé konsege atinje progresu lubuk ida, iha dezenvolvimentu, iha infraestrutura, no estabelese kursu foun lisensiatura no mestradu lubuk ida durante mandatu”, tenik Reitór.
Magnífiku Reitór mós hatutan tan katak, dezde inísiu ezisténsia universidade nian, UNTL kontribui ona rekursu umanu husi área oioin ne’ebé UNTL oferese.
“Ha’u-nia inisiativa iha lideransa ne’e, tanba hakarak atu fortalese jestaun, lideransa, mellora kualidade rekursu umanu, peskiza, prestasaun komunitária, kooperasaun iha nível nasionál, rejionál, internasionál, no mantein lasu kooperasaun ho universidade seluk iha rai laran”, dehan Profesór João Martins.
Reitór salienta tan katak sei servisu hamutuk ho estrutura, inklui sívitas akadémika tomak, hodi lori universidade ne’e ba oin, no agradese ba inisiadór, fundadór sira, Reitór sesante sira universidade nian ne’ebé dedika-an ona ba ezisténsia UNTL nian.
Iha fatin hanesan, liuhusi diskursu, Sua Exelénsia, Ministru Ensinu Superiór, Siénsia no Kultura (MESSK), Profesór Longuinhos dos Santos ho esperansa katak, estrutura emposadu, sei halo mudansa ba universidade, liuliu garante kualidade rekursu, ne’ebé prontu partisipa iha dezenvolvimentu nasionál.
“Durante tinan lima ne’e, estrutura ne’ebé lidera husi Profesór Doutór Francisco Miguel Martins hatudu ona mudansa liuhusi esforsu, ne’ebé ita bele haree hanesan kontrusaun ba edifísiu foun ida ne’e (Kampus Hera), no edifísiu tolu ne’ebé iha hela faze konstrusaun”, tenik Ministru Ministru Ensinu Superiór, Siénsia no Kultura.
Partisipa iha serimónia ne’e Prezidente Komisaun G Parlamentu Nasionál no reprezentante Prezidente Parlamentu Nasionál nian, Deputadu António Verdial de Sousa Ministru Ensinu Superiór, Siénsia no Kultura, Profesór Longuinhos dos Santos, Ministru Edukasaun, Juventude no Desportu, Profesór Doutór Armindo Maia, Ministra Saúde, dr. Odete M. F. Belo, Ministru Petróleu no Minerais, Profesór Doutór Vítor Soares, Provedora Direitu Umanu no Justisa, Dra. Jesuína Maria F. Gomes, Komisáriu CAC, Dr. Sérgio Hornai, Prezidente Komisaun Funsaun Públika, Profesór Doutór Faustino Cardoso Gomes, Diretór Ezekutivu, ANAAA Profesór Doutór Edmundo Viegas, Premiadu Nobel da Pás, Doutór José Ramos Horta, Prezidente IPB, Reitór Universidade Privada, Amu Kapelaun Pe. Nivio Lebre Correia, Fdcc, Korpu-Diplomátiku, Reprezentante JICA nian, estrutura sesante, dosente, estudante no konvidadu sira.
Média UNTL 📝 : Miguel Gonçalves
Foto 📷 : Agostinho da Cruz e Silva, Moises do Rego