UNTL NIA EKIPA FUTEBÓL FETO PARTISIPA LFTL 2020

Escrito por Mateus Goncalves Visualizações: 1536
bola1
 
#TimorLeste #UNTL 16 Setembru 2020
Universidade Nasional Timor-Lorosa’e (UNTL), nia Proreitór Asuntu Estudantíl, Profesór Zeferino Viegas Tilman, iha Kampus Sentrál UNTL nian, Díli, hateten katak atualmente universidade nasionál nia Ekipa Futeból Feto partisipa iha Liga Feto Timor-Leste (LFTL) 2020 nian hatudu kualifikasaun di’ak.
 
“UNTL nia klube Akadémika partisipa iha Liga FFTL 2020, ho objetivu dahuluk hodi marka UNTL nia prezensa iha sosiedade nia leet, daruak fó biban ba atleta talentozu sira espresa sira-nia talentu desportivu, no atu promove selesaun ba fini jogadór sira atu partisipa iha eventu internasionál sira hodi reprezenta Timor-Leste liuliu Asia University Games”, hatutan Proreitór.
Proreitór Tilman konvida estudante hotu UNTL nian, tantu feto no mane, ne’ebé iha talentu desportivu bele hakbesik ba Gabineti Proreitór Asuntu Estudantíl (GPRAE) atu envolve iha formsaun tuir modalidade ne’ebé iha.
 
Aleinde ne’e, treinadór Ekipa Akadémika nian Sr. Francisco Baptista Xavier akresenta katak, Ekipa Futeból feto hamutuk na’in 27 ne’ebé kompostu husi jogadora na’in 25 no baliza na’in rua, sira sempre preparadu atu hatudu sira-nia téknika jogu iha LFTL.
 
“Ekipa nia preparasaun enjerál ne’e ami hahú iha fulan hirak liubá, antes jogo ne’e komesa, no hasoru ita-nia adversáriu liuliu fó treina ba jogadora sira iha parte fíziku, halai no atu mantein ida-idak nia fatin iha kampu laran”, subliña treinadór.
 
bola2
 
Iha parte seluk, jogadora Nelia Asunção Soares hateten katak benefísiu ba sira nu’udár futebolista feto nian, bele hatudu sira-nia talentu no universidade fó bolsu-estudu ba sira, no bele eleva sira-nia abilidade nu’udár futebolista ba Timor-Leste.
 
“Mai ha’u importante mak fahe tempu ba treinu, no tempu ba aula nian iha universidade hodi aprende matéria, tanba ne’e husu ba kolega feto sira labele moe no tauk mai ita promove desportu”, tenik Asunção.
 
Kualifikasaun jogu dezde loron 5 jullu 2020 mak hanesan: klube Nain feto hasoru Akademika-FC (manan 5-0), daruak klube Mau Doko hasoru Akademika-FC (manan 6-0), datoluk klube Ade Silbere Laulara hasoru Akademiku (lakon 2-0), dahaat klube VDL Lahane hasoru Akadémika-FC (manan 2-0), jogu dalima klube São José hasoru Akadémika-FC (manan 7-0).
Adademika-FC partisipa jogu ne’e ba dalimak ona, iha prestasaun demonstra katak manan dalahaat no derrota dala ida.
 
Iha jogu tuir mai FC-Akadémiku sei hasoru UNITAL-FC iha loron domingu 20 setembru 2020, 16h00, iha Kampu Demokrasía, Bairro dos Grilos, Díli.
 
Média UNTL 📝: Geraldino Pereira Magno (estajiáriu)
Foto 📷: Humbertu Alves (estajiáriu), Jacob Pinto Guterres (estajiáriu), Arkivu GPRAE