UNTL OFISIALMENTE ENTREGA ESTAJIÁRIA PARTEIRA NA’IN 69 BA HOSPITAL REFERAL HOREX BAUCAU

Escrito por Mateus Goncalves Visualizações: 2928
IMG 6291
 
#TimorLeste #UNTL #FMCS 16 Setembru 2020
Universidade Nacional Timor Lorosa’e (UNTL), nia Magnífiku Reitór, Profesór Doutór Francisco Miguel Martins, ofisialmente entrega estajiária na’in neenulu resin sia (69) husi Eskola Superiór Parteira, Fakuldade Medisina no Siénsia Saúde (FMCS), ba Diretora Servisu Apoiu Diagnóstika no Terapéutika, Dra. Fabiola Monteiro Guterres, hodi hala'o Estájiu Klinika, iha Hospital Referal Horex Baucau (15/09), Munisípiu Baucau.
 
Reitór UNTL iha nia diskursu hateten katak, estajiária sira husi Eskola Súperior Parteira aprende ona siénsia no prátika laboratóriu husi profesór sira iha universidade no iha estájiu klinika sira aprende korelasaun prátika konkreta no konverta teoria iha pratika.
 
IMG 6210
Estudante ESP iha Hospital Referal Horex Baucau.
 
“Husu ba estudante hotu, tau aas profesionál ho étika liga ho siénsia ne'ebé imi aprende iha universidade, no hahú ohin presiza buka hatene, observa no prátika husi superiór parteira sira iha hospitál ne'e,” hateten Reitór UNTL.
 
Iha fatin hanesan, reprezentante Diretór Ezekutivu Hospitál Referél nian, Dr. Jaime de Jesus Araújo, hateten katak Hospital Referal Baucau dala ida tan hetan oportunidade diak tebes simu estudante estajiária parteira sira husi UNTL.
 
IMG 6245
 
“Ho ita boot sira-nia prezensa hodi hetan esperiénsia foun ruma liuhusi pratika pertinente ho siénsia ne'ebé ita boot sira estuda iha aula hodi implementa iha ospitál atu hasa'e imi-nia kapasidade ba futuru,” hateten Dr. Jaime.
 
Dr. Jaime mós espera katak, liuhusi estajiária sira-nia prezensa ne'e sai hanesan mós suporta ida ba parteira sira iha Hospital Baucau hodi fó atendimentu ba pasiente sira.
Estájiu Klíniku refere, estajiária parteira nain 69 ne'e sei destaka iha lokál hahú husi loron 15 setembru to’o 2 dezembru 2020.
 
IMG 6195
 
Partisipa iha eventu ne'e Reitór UNTL nian, Proreitór Asuntu Garantia Kualidade Interna, Profesór Marcos António Amaral, Dekanu FMCS nian, Profesór José Dionisio Ximenes, Diretór-Jerál Servisu Apoiu Reitoria, Sr. Jacinto Belo, Diretora Servisu Apoiu Diagnóstika no Terapéutika, reprezentate Diretór Ezekutivu, Diresaun no Xefe Departamentu Hospital Referal Horex Baucau, inklui estajiária sira.
 
Média UNTL 📝 : Mateus Gonçalves
Foto 📸 : Mateus Gonçalves