UNTL NIA KURSU FORMASAUN PROFESÓR EDUKASAUN PRÉ-ESKOLÁR HETAN ONA AVALIASAUN PRELIMINÁR HUSI ANAAA

Escrito por Mateus Goncalves Visualizações: 1326

119139412 3426537394034288 2768482024397719806 o

#TimorLeste #UNTL #FEAH #ANAAA 15 Setembru 2020

Universidade Nacional Timor Lorosa'e (UNTL), liuhusi Fakuldade Edukasaun Arte no Umanidade (FEAH) nia Departamentu Formasaun Profesór Edukasaun Pré-Eskolar (DFPEP), hetan ona avaliasaun preliminár husi Ajénsia Nasionál ba Avaliasaun no Akreditasaun Akadémika (ANAAA).

Relasiona ho progresu avaliasaunn nian, Proreitór ba Asuntu Garantia Kualidade Interna, Profesór Marcos António Amaral iha Kampus Liceu UNTL nian (10/09) hateten katak, DPFEP kursu foun ida iha UNTL tan ne'e ANAAA nia avaliasaun preminár refere hodi haree ba progresu departamentu.

“Avaliasaun ne'e ita bolu preliminár ba Departamentu Formasaun Profesór Edukasaun Pré-Eskolar. Departamentu ne’e ita foin rejista no hetan ona lisensa husi Ministériu Ensinu Superiór, Siénsia no Kultura (MESSK) hodi hala'o atividade letivu, ho nune’e mak ekipa avaliadór ANAAA nian mai haree progresu departamentu ne'e rasik”, tenik Proreitór.

Proreitór mós hatutan katak liuhusi avaliasaun ne'e mós atu fo hanoin ba responsável sira iha kursu refere liuhusi relatóriu ne'ebé entrega ona ba ANAAA, tanba ho sira-nia prezensa atu hare ba realidade ne'ebé refere iha relatóriu.

Iha parte seluk Vise-Dekanu Asuntu Akadémika FEAH nian, Profesór Elvis Brites, iha nia entrevista hateten katak, iha rekomendasaun lubuk ida husi avaliadór sira, no hato'o ba parte universidade atu prepara rekursu umanu liuliu dosente iha área espesífiku relasaun ho área sientífiku Departamentu nian, inklui mós fasilidade sira.

 

“Avaliasaun preliminár ne’e hanesan matadalan ida ne’ebé leno hela mai ita atu ita bele hadia liuhusi rekomendasaun sira, ita presiza prepara ita-nia rekursu umanu espesífiku ba Departamentu nian, no kompleta fasilidade própriu hanesan biblioteka, fasilidade prátika no seluk tan”, tenik Prof. Elvis.

Profesór Elvis mós hatutan tan katak, ba oin fakuldade sei aposta iha planu hodi responde ba rekomendasaun sira hanesan dosente ne’ebé ho área espesífiku iha edukasaun pré-eskolar nian, no fasilidade sira.

Prosesu avaliasaun ne’e partisipa husi Magnífiku Reitór, Profesór Doutór Francisco Miguel Martins, Proreitór Asuntu Akadémiku, Profesór Miguel Maia dos Santos, Dekana FEAH, Profesora Doutora Ana Cristina Silveira de Jesus Martins, Diretora DFPEP nian, Profesora Madre Francisca Maria Soares dos Reis, ho dosente DFPEP sira, inklui ekipa ANAAA nian.

Média UNTL 📝 : Nelia Manuela da Costa (estajiária)
Foto 📷 : Rafael da Costa dos Reis (estajiáriu)