UNTL-FD FORMALIZA GRAU LISENSIATURA BA FINALISTA NA’IN 17

118616498 3388799264474768 8746801538657417807 o
#TimorLeste #UNTL #FD 3 Setembru 2020
Universidade Nacional Timor Lorosa’e (UNTL), nia Fakuldade Direitu (FD) realiza judisium iha Auditóriu Muzeum Rezisténsia Timorense (AMRT) (28-8), hodi formaliza grau lisensiatura 🎓 ba finalista na’in sanulu resin hitu (17) ne’ebé konklui ona sira nia estudu no prenxe rekizitu hotu, hodi hein ba graduasaun.
 
Iha eventu refere, reprezentante Magnífiku Reitór nian, Proreitór ba Asuntu Akadémiku nian, Profesór Miguel Maia dos Santos, lori universidade nasionál nia naran hato’o nia saudasaun, sabedoria no verdade (sapientia et veritas) ba finalista na’in 17, ne’ebé konklui ona sira nia estudu no formadu hodi kontribui ba dezenvolvimentu nasionál nian.
 
118795763 3388797757808252 2089988893688052151 o
“Ba imi na’in 17, ohin kontinua pájina foun ho kompeténsia inteletuál tanba konklui ona formasaun umana iha nível lisensiatura área direitu nian, tanba ne’e, universidade dezeja susesu ba imi idaidak”, hateten Proreitór ba Asuntu Akadémiku nian.
 
Iha fatin hanesan, Dekanu FD nian, Profesór Isidoro Viana da Costa, kongratula esforsu graduadu na’in 17 ne’e, liuliu ba idaidak nia família ho apoiu no sakrifísiu tomak durante tinan lima mak determina oan sira-nia susesu.
 
118614659 3388797147808313 8481547900606566984 o
“Obrigadu ba imi hotu ne’ebé dezempeña idaidak nia funsaun, finalista sira ne’ebé estuda maka’as hodi konklui imi nia estudu, inan aman sira nia apoiu ba oan sira, profesór no funsionáriu sira Fakuldade nian, ne’ebé akompaña iha prosesu tomak aprendizajen nian, mezmu iha dezafiu maibé nafatin ho korajen mak ohin lori ita mai iha ne’e hodi hein graduasaun iha loron hirak mai”, tenik Dekanu FD.
 
Profesór Isidoro mós husu ba formadu i finalista na’in 17ne’e, atu aplika siénsia ne’ebé sira aprende iha instituisaun ne’ebé sira sei hola parte ba, hodi ajuda estadu no sosiedade liuliu iha área justisa nian.
 
118343121 3388798037808224 4221948846358793209 o
Entretantu Finalista FD nian, Ernestro Barreto, hateten katak judisium hanesan eventu formalidade ne’ebé halo hodi ofisializa katak finalista idaidak konklui ona sira nia estudu no prienxe ona rekizitu sira antes graduasaun, no promete atu aplika siénsia ne’ebé hetan iha sosiedade.
 
“Ohin ami konsege ultrapasa tan pasu ida, hafoin dezafiu oioin ne’ebé ami enfrenta iha prosesu aprendizajen, maibé orgullu ho siénsia ne’ebé ami aprende iha área direitu nian, natoon ona atu aplika iha sosiedade”, dehan Barreto.
 
118582466 3388798424474852 195531152469118020 o
Partisipa iha eventu refere, reprezentante Reitór nian, Proreitór ba Asuntu Akadémiku nian, Profesór Miguel Maia dos Santos, Dekanu FD ho nia estrutura Fakuldade, Eis-Reitór UNTL nian, Profesór Doutór Benjamim de Araújo e Corte-Real, ne’ebé hanesan mós dosente iha FD no Diretór Institutu Nasionál Linguístika, inklui mós dosente, estudante, funsionáriu, família no konvidadu sira.
 
Média UNTL 📝: João Bosco (estajiáriu), Melania Panderosa (estajiária), Miranda Guterres (estajiáriu)
Foto 📷: Rafael dos Reis (estajiáriu), Geraldino Magno (estajiáriu)