UNTL-FEG ESHANA KOMEMORA LORON KONSULTA POPULÁR HO MARSA AMBIENTÁL

Escrito por Mateus Goncalves Visualizações: 1460
118602580 3385929671428394 6644910463188967986 n
#TimorLeste #UNTL #FEG 2 Setembru 2020
Universidade Nasional Timor Lorosa’e (UNTL), nia Fakuldade Ekonomia i Jestaun (FEG), liuhusi grupu Estudante Hadomi Natureza (ESHANA), komemora tinan 21 Konsulta Populár 30 agostu (1999-2020), liuhusi atividade marsa ho limpeza husi área Timor Plaza (TP) to’o Largo Lecidere ho tema “Konsensializasaun ba Konservasaun Ambiente” (30/08).
 
Relasiona ho atividade marsa ne’e, Koordenadór ESHANA nian, Cesaltino da Silva Belo, hateten katak objetivu husi marsa refere atu fó hanoin ba komunidade sira iha Díli laran, liuliu estudante sira atu iha konsiensia hodi soe lixu iha nia fatin no bele muda mentalidade komunidade nian hodi hadomi ambiente.
 
118478937 3385928954761799 2814143207787024550 n
“Liuhusi atividade ne’e, atu fó hanoin ba komunidade sira iha Díli laran, hodi so’e foer iha nia fatin, nune’e mós atu transforma ema nia hahalok tanba antes ne’e iha fatin públiku sira, ema so’e foer arbiru. Problema lixu ohin loron la’os ami deit mak preukupa, maibé ita-nia estadu nomós mundu tomak preokupa”, tenik koordenadora ESHANA.
 
Entretantu, Diretór Nasional Kontrolu Poluisaun, ne’ebé tutela iha Sekretáriu Estadu Ambiente nian, Sr. Nelson Madeira, apresia ho ESHANA nia ezisténsia tan bele organiza atividade refere, aleinde komemora loron Konsulta Populár aktividade ne’e mos bele eduka komunidade.
 
“Ha’u apresia tebes, tanba Fakuldade Ekonomia i Jestaun-UNTL iha grupu ida naran ESHANA ne’ebé mak iha inisiativa rasik hodi promove atividade ida ne’e, hodi komemora loron Konsulta Populár tinan 2020 ho meiu ne’ebé diferente no edukativu”, tenik Diretór Nelson.
 
118731773 3385927311428630 6523435690467001190 n
 
Iha atividade ne’e, partisipa husi Xefe Departamentu Saúde Ambientál Sr. José Moniz, reprezentante HASATIL Sra. Lania Amaral, estudantes universitáriu husi UNTL no UNPAZ, inklui estudante sira husi ensinu sekundáriu sira iha Díli laran.
 
Atividade ne’e realiza ho apoiu husi Autoridade Munisípiu Díli, Autoridade Lokál Suku Bidau nian, Konsellu Nasional Juventude Timor-Leste (CNJTL), Sekretariadu Tékniku Administrasaun Eleitoral (STAE), Empreza Star Printing, Cool, Bee Lafaek no Polísia Nasionál Timor-Leste (PNTL).
118651698 3385926888095339 3123072906209840681 n
 
Média UNTL 📝: Agostinho Ximenes da Cruz (estajiáriu), Nelia Manuela da C. Freitas (estajiária)
Foto 📷: Agostinho Ximenes da Cruz (estajiáriu)