#TimorLeste #UNTL #FMCS 1 Setembru 2020
Universidade Nacional Timor Lorosa’e (UNTL) nia Fakuldade Medisina Siénsia Saúde (FMCS) realiza judisium hodi atribui títulu lisensitura nian ba estudante na’in tolunulu resin lima (35) ne’ebé preparadu ba graduasaun, no iha tempu hanesan hala’o mós juramentu profisionál.
Dekanu FMCS nian, Profesór José Deonisio Ximenes, hateten katak estudante ne’ebé simu ona judisium no juramentu profisionál, Fakuldade sei entrega sira-nia naran ho lista ofisiál ida Ministériu Saúde hodi koloka hanesan rekursu profisionál iha área ne’ebé presiza.
“Ami koordena ona hodi entrega sira ba Ministériu Saúde, nune’e, ba futuru, atu akumula sira hanesan profisionál, tau iha fatin servisu tuir prioridade sira hodi fó atendimentu ba komunidade iha Timor-Leste”, tenik Dekanu FMCS iha Salaun Luz Clarita, Díli.
Dekanu ne’e mós husu ba sira na’in 35 ne’ebé preparadu ba graduasaun iha períodu ne’e katak, idaidak nafatin iha vontade atu kontinua aprende hodi demonstra sira idaidak nia profisionalizmu hodi serbí povu.
Iha fatin hanesan, reprezentante Ministériu Saúde nian, Diretór-Jerál Servisu Koorporativu, Sr. Victor Soares Martins, hato’o parabéns ba estrutura Fakuldade nian nomós ba finalista sira ne’ebé ofisialmente simu ona sira-nia títulu akadémiku husi universidade liuhusi juramentu profisionál.
“Ministériu Saúde nia servisu hamutuk ho UNTL importante tanba universidade nasionál prodús rekursu kualifikadu no ba oin sei hatuur iha planu hodi rekruta no koloka iha sentru saúde sira iha territóriu tomak”, hatutan Diretór-Jerál Servisu Koorporativu.
Entretantu, iha judisium refere estudante ne’ebé simu ona títulu lisensitura husi FMCS, Letícia Jomardo da Costa Soares, hateten, siénsia ne’ebé nia aprende ona iha Univerisdade Nasionál, kompromete aplika iha sosiedade.
“Ita hotu hatene katak problema mal nutrisaun ne’ebé aas tebes iha Timor-Leste, nune’e siénsia ne’ebé ha’u iha, sei kontribui ba redusaun mal-nutrisaun no ajuda komunidade moris ho saudável,” tenik Letícia.
Estudante na’in 35 ne’e kompostu husi Departamentu Farmásia na’in 22 no Departamentu Nutrisaun i Dietétika hamutuk na’in 13.
Partisipa iha judisium ne’e, Proreitór Kooperasaun, Profesór Doutór Eduardo Aniceto Serrão, Diretór Nasional Atendimentu Estudante, Sr. Rui Loco Pires, reprezentante Ministériu Saúde nian, reprezentante Brigada Médika Cubana nian, reprezentante husi Ospitál Nasionál Guido Valadares (HNGV), estrutura Fakuldade, dosente, estudante no konvidadu sira.
Média UNTL 📝: Santidade Marinela Ribeiro (estajiária), Jacob Pinto Guterres (estajiáriu)
Foto 📷: Jacob Pinto Guterres (estajiáriu)