#TimorLeste #UNTL #ANAAA 13 Agostu 2020
Universidade Nacional Timor Lorosa’e (UNTL), nia Proreitór ba Asuntu Garantia Kualidade Interna, Profesór Marcos António Amaral, iha Kampus Sentrál UNTL nian, Díli informa katak bazeia ba publikasaun husi Ajénsia Nasionál ba Avaliasaun no Akreditasaun Akadémika (ANAAA) nian, demonstra katak rezultadu avaliasaun programátika dezde 2016 to’o 2019 UNTL nia kursu 28 mak akreditadu.
“Kursu ne’ebé akreditadu hamutuk 28 mak reprezenta ho persentajen 48,3 husi totál kursu baixarel, lisensiatura, inklui pós-graduasaun no mestradu hamutuk limanulu resin ualu (58), enkuantu kursu 30 mak seidauk hetan avaliasaun husi ANAAA”, hatutan Proreitór.
Profesór Marcos indika katak iha 2016 universidade nasionál nia kursu Enjeñaria Informátika mak pasa iha avaliasaun ho 60% (klasifikasaun C), no iha 2017 iha kursu haat mak Enjeñaria Sivil pasa ho 72% (klasifikasaun C), Ensinu Dalen Portugés pasa ho 61% (klasifikasaun C), Siénsia Ekonomia pasa ho 50% (klasikasaun C) no mós Jestaun pasa ho 73% (klasifikasaun C).
“2018 kursu ualu: Enjeñaria Mekánika akredita ho 77% (klasifikasaun B), Enjeñaria Eletrónika i Elétrika ho 78% (klasifikasaun B), Komérsiu i Turizmu ho 60% (klasifikasaun C), Ensinu Dalen Inglés ho 75% (klasifikasaun B), Ensinu Biolojia ho 60% (klasifikasaun C), Ensinu Fízika ho 56% (klasifikasaun C), Ensinu Kímika ho 61% (klasifikasaun C) no Ensinu Edukasaun Fízika i Desportu la pasa ho 40%”, hatutan Profesór Marcos.
Iha entrevista, Proreitór salienta tan katak iha 2019 iha kursu 16 mak akredita ona, hanesan Jeolojia i Petróleu ho 71% (klasifikasaun C), Ensinu Matemátika ho 53% (klasifikasaun C), Formasaun Profesór Ensinu Báziku ho 76% (klasifikasaun B) no kursu Agronomia ho 79% (klasifikasaun B).
”Kursu Agro-Sosio-Ekonomia pasa ho 67% (klasifikasaun C), Agro-Pekuária ho 72% (klasifikasaun C), Saúde Animál ho 67% (klasifikasaun C), Polítika Públika ho 71% (klasifikasaun C), Dezenvolvimentu Komunitáriu ho 69% (klasifikasaun C), Siénsia Polítika ho 59% (klasifikasaun C), Enfermajen ho 76% (klasifikasaun B), Parteira ho 77% (klasifikasaun B), Medisina Jerál ho 75% (klasifikasaun B), Filozofia ho 67% (klasifikasaun C) no Direitu Jerál ho 75% (klasifikasaun B)”, tenik Proreitór.
Proreitór Amaral detalle tan katak atu mellora klasifikasaun husi kursu sira, universidade sei buka hatan ba (1) kompleta númeru dosente, (2) mellora jestaun finanseira no administrativa, (3) halo revizaun kurrikulár, (4) dezenvolve peskiza, publikasaun iha livru, artigu no seluk tan, no (5) hadia no kompleta fasilidade, hare’e liuliu ba kondisaun sala-aula, biblioteka, no laboratóriu.
Média UNTL 📝: Miguel Gonçalves
Foto 📷: Miguel Gonçalves, Agostinho da Cruz e Silva