Estudante Nain 4 Atu Tuir Programa Intercâmbiu iha Universidade de Aveiro, Portugal

Escrito por Mateus Goncalves Visualizações: 987

Estudante nain 4#UNTL, 8 fevereiru 2019

Dekanu Faculdade Ciências Exatas, hosi Universidade Nacional Timor Lorosa’e (UNTL), Profesór Doutór Samuel Freitas apresenta estudante nain hat (4) ba Reitór UNTL, Profesór Doutór Francisco Miguel Martins, molok sira desloka atu ba tuir Programa Intercâmbiu iha Universidade de Aveiro, iha Portugal, durante fulan ne’en (6).

Estudante hirak ne’e primeiru finalista husi Faculdade Ciências Exatas ne’ebe hatudu desempenho académica di'ak liu iha fakuldade refere. Entre sira nian haat ne’e, nain rua reprezenta disiplina matemátika no nain rua disiplina kímika.

Universidade Aveiro oferese oportunidade atu ba tuir interkámbiu hodi hasa'e estudante UNTL sira nia nível konhesimentu iha área kimika no matemätika nian.

“Estudante sira presiza eleva sira-nia conhecimento ho cultura no realidade nebe’e la hanesan hodi nune’e bele kontribui fali ba família, komunidade, sosiedade no universidade iha Timor-Leste,” hateten Reitór UNTL.

Reitór Martins mós subliña liután katak durante formasaun, bolseiru refere sei hetan oportunidade ba usa equipamentu laboratóriu no tuir formasaun ensino no aprendizajem ho karater diferensiadu relasiona ho realidade Timor-Leste nian.

Programa interkámbiu ida ne’e hetan apoiu finanseiru husi Governu Timor-Leste liu husi Fundu Desenvolvimentu Capital Humano (FDCH).

 

Média UNTL
Foto: Mateus Gonçalves