#UNTL, 6 fevereiru 2019
Universidade Nacional Timor Lorosa’e (UNTL) liuhusi Departamentu Pós-Graduasaun i Peskiza halo parseria ho IRASEC (Institutu ba Peskiza Kontenporánea Asia-Sudeste) hala’o semináriu ho tema “Governansa área kosteira iha kontekstu urbanizasaun turístika rápida i mudansa klimátika iha Sudueste Aziátiku”, iha Fundação Oriente, Dili.
Magnifiku Reitór Profesór Doutór Francisco Miguel Martins hateten semináriu ne’e importante atu tau hamutuk hanoin husi peskizadór sira atu prevene área kosteira ka tasi-ibun labele hamosu erozaun.
“Mudansa klimátika asuntu prioridade ba nasaun hotu, tan ne’e importante atu fo hanoin hodi kuidadu tasi ibun no rai-maran atu nune’e la bele mihis ba bebeik”, tenik Reitór.
Reitor Martins hatutan seminariu refere halao atu matenek nain sira sei fó hanoin ruma ba Estadu nu’udar responsável ba nasaun tomak ninia area terrestre, marítima, no aerea.
“Ita presiza vizaun naruk nian atu hanakloken potensial bo’ot hosi ita nia komunidade kosteira sira. Iha nesesidade urjente atu dezenvolve estratejia informadu no sustentável ba susessu aban-bainrua nian, atu bele dada investimentu no vizitante ba área sira ne’e, ne’ebe la estraga ninia rekursu natural ka hamenus ninia potentialidade bo’ot,” haktuir tan Reitór Martins.
Liga ho asuntu kosteira ka tasi-ibun iha kontekstu urbanizasaun turístika peskizadór UNTL Profesór Januario Coreia hateten setór turizmu importante ba dezenvolvimentu sustentável.
“Bazeia ba estudu ne’ebé ami iha, hatudu katak koñesimentu iha área turizmu ne’e foin maka iha nivel altu, tanba ne’e presiza sensibilisaun ba komunidade atu hatene hodi kontribui ba dezenvolvimentu liuliu setór turizmu iha Timor-Leste bazeia ODS 13 kona-ba asaun klimátika”.
Iha semináriu ne’e peskizadór sira husi Tailándia, Indonézia, Austrália no Timor-Leste halao aprezentasaun sira-nia estudu kazu kona-ba metodolojia prevensaun área tasi-ibun nian husi impaktu negativu sira ba mudansa klimátika nian.
Média UNTL/ Estajiária: Leonia de Araújo
Foto: Moises do Rego