Ekipa Reitoria Universidade Nacional Timor Lorosa’e (UNTL) desloka ba Munisípiu Bobonaru kuarta-feira (4-7 abril), iha ne’ebé apoiu husi Autoridade Munisípiu Bobonaru hodi observa no rekulla dadus impírika ruma to’o ikus rezultadu sei aprezenta 25-28 abril iha Konferénsia Trilaterál (Indonézia, Austrália no Timor-Leste) iha Atambua.
Iha Bee-Matan IL-Chul, suku Lontas, Postu-Adeministrativu Lolotoe, Munisípiu Bobonaru (6-03), Reitór UNTL, Francisco Miguel Martins hateten objetivu husi suvei ne’e nia rezultadu sei aprezenta iha Reuniaun Trilaterál.
“Survei ne’e atu mai haree bee-matan ne’ebé fó moris ba parte rua Timor-Osidentál no Timor-Leste ne’ebé asesu tanba ne’e atu ema labele manipula dadus ita maka hatudu loloos dadus konkreta atu esklarese iha reuniaun ne’e, iha ne’ebé UNTL maka responsabiliza ba rezultadu ne’e”.
Fonte ne’e hatutan mós katak liuhusi observasaun ne’e bele hatene ona fornesimentu bee loloos nu’udar fontes-da-vida tantu ba parte Timor-Osidentál no Timor-Leste ne’ebé asesu.
Liuhusi istória ne’ebé haktuir husi lianain sira, Magnífiku Reitór hatutan katak bee-matan hirak ne’e benefísiu boot tebes husi bee ne’e dezde bizavon sira, tanba ne’e maské la’o ain de’it ho distánsia dook maibé hanesan akadémiku ba rai ida ne’e, sei serví ho loloos no infomasaun adekuadu.
“Durante eventu Trilaterál ne’e loron dahuluk konvoka reuniaun, trasa-planu no iha loron daruak sei halo vizita lokál, molok ne’e ita nain hatene uluk dadus hanesan matadalan hodi lori sira mai iha ne’e. Maibé iha aprezentasaun sira nian loos maka ita aseita sela’e justifika ho rezultadu suvei ne’e”
Iha fatin hanesan Jacinto de Jesus, nain husi bee-matan IL-Chul ne’e, hatuir katak uluk liu bee ne’e maran tiha fulan tolu hafoin sira-nia beiala maka hamulak fali hodi bolu maka bee ne’e mai fali to’o oras ne’e.
“Atu fó han ka hamulak ami nain rasik maka bele, ema seluk labele, nomós nia matan loloos ne’e ema matan foun labele ba besik, sela’e matan-at. Nia moos maské tempu udan ka bailoron hanesan de’it”.
Durante Ekipa UNTL ne’e hala’o suvei ba uluk iha Bee-matan “IL-Chulba Hoo Lolo” suku Tapo/Memo Postu-Administrativu Maliana, Munisípiu Bobonaru. entretantu bee-matan IL-Chul lokaliza iha Suku Lontas, Postu-Administrativu Lolotoe no entrevsita mós ho lia-nain sira.
Hafoin rezultadu husi suvei ne’e sei aprezenta iha konferénsia Trilaterál (25-28 abril (Indonézia, Austrália no Timor-Leste). *EKR*