Institutu Nasionál Linguístika (INL) UNTL hala’o diseminasaun interna durante loron tolu ba dosente, funsionáriu no estudante finalista sira hodi promove uzu Ortografia padronizada iha sira-nia fatin servisu nian.
Iha fatin formasaun nian auditóriu-Liceu, kuarta-feira ne’e, Diretór Jerál INL Benjamin Cortereal hateten antes hahú kursu ne’e la espera kursu ne’e partisipa másimu husi formandu sira.
“Normalmente ita-nia atetude katak ami ko’alia no hakerek hela Dalen Tetun ne’e la presiza ona kursu nune’e, presiza disemina informasaun tanba hola parte ba perfil akadémiku nian maibé hein katak futuru sei partesipa di’ak liután”.
Eis-reitór UNTL ne’e hatutan formasaun ne’e importante loos ba dosente sira tanba pessoál administrasaun sira-nia lian tetun komesa di’ak liu fali dosente sira tanba ne’e dosente sira presiza hatene barak liután.
Entretantu Reitór UNTL, Francisco Miguel Martins hateten tetun hanesan lian ofisial ne’ebé konsagra iha artigu 13 konstituisaun RDTL tan ne’e presiza tane aas.
“Tetun nu’udar parte integrál ida, lia-ofisiál ne’ebé ita presiza implementa nia rigor hirak ne’ebé iha ita-nia komunikasaun sira tantu orál e eskrita. INL ne’e moris koinsidénsia ho UNTL inklui CNIC iha 17 novembru 2000”.
Fonte ne’e sublina mós katak INL iha kompeténsia liuhusi dekretu lei Governu nian atu regula lian tetun iha nasaun ida ne’e, funsaun hotu tantu ortografia no gramátika ne’ebé válidu ba sosiedade.
“Formasaun ne’e importante teb-tebes ba professór sira atu entende ortografia tetun nian tanba sira maka sei hadia estudante sira-nia traballu akadémiku no sientífiku sira iha lia tetun ho di’ak”.
Maske kritika barak husi sosiédade kona-ba liafuan balun maibé Magnifíku Reitór enkoraja INL hodi realiza kongresu boot ida atu hadia liafuan balun no aumenta liafuan balun.
Relasiona ho eventu ne’e, Aderito Jose Guterres Correia hanesan Peskizadór INL nian iha Liceu Segunda-Feira ne’e hateten objetivu husi eventu ne’e lori partesipante sira iha koñesimentu di’ak hodi uza Ortografia padronizada.
Enkuantu partesipante husi Fakuldade Edukasaun Arte no Umanidade Professór Marcelo Caetano de Sousa hateten formasaun ne’e ba formandu sira ho entuziasmu atu uza língua tetun sai dalen ofisiál Tetun nia ortografia ho di’ak
Haree husi partesipasaun dosente no funsionáriu sira nain 18 maka frekuenta formasaun loron tolu ne’e, dezde segunda-feira to’o kuarta-feira semana ne’e, iha ne’ebé distribui mós dinsionáriu no gramátika ba formandu sira. *EKR*