Universidade Nacional Timor Lorosa’e (UNTL) liuhsi Gabinete Reitória, Pro-reitória Asuntu Kooperasaun koopera ho United Nations Population Fund (UNFPA) hodi partila informasaun ba estudante sira iha ámbitu Objetivu Dezenvolvimentu Sustentável 1o no 10o (redusaun pobreza no redusaun ba desigualdade).
“Klasse espesiál ida ne’e konsentra liubá Objetivu Dezenvolvimentu Sustentável (ODS) 1o kona-ba redusaun-pobreza no 10o redusaun desigualdade tanba Timor-Leste sei enfreta hela situasaun pobreza ne’e”.
UNTL iha estudante ho númeru boot tantu feto-mane, tanba ne’e, Pró-Reitór sublina katak sira presiza hatene impaktu saida maka populasaun sei moris iha pobreza no desigualdade ne’e.
“Iha aprezentasaun ne’e UNFPA hatudu parte ida kona-ba planeamentu familiár foin sa’e sira katak estudante sira presiza hatene oinsá estabelese família ida”.
Enkuantu Vise-Prezidente United Nations Population Fund (UNFPA) nian iha Timor-Leste, Domingas Bernado hateten dezde 1999 UNFPA hala’o nia programa haat; Saúde Produtiva, Igualdade jéneru, Juventude, no apoia Diresaun Nasionál Estatístika ne’ebé halo Sensus.
Adjunta UNFPA ne’e mós akresenta liután katak Timor-Leste liuhusi estudu demográfiku hatudu katak feto sira ho idade menus tinan 20 ho porsentu 24 maka kaben sedu tanba ne’e labele asesu ba edukasaun.
Iha fatin hanesan, Prezidente Asosiasaun Estudante, Fakuldade Enjeñaria I Siénsia Teknolojia, Siverio dos Santos Correia profere katak iha informasaun barak maka hetan iha klasse espesiál ne’e relasiona ho planeamentu familiár.
“Ha’u sei uza no partila informasaun hirak ne’e ba belun estudante sira no komunidade iha ne’ebé ha’u hola parte”
Iha sesaun ne’e abertura husi Reprezentante Reitór-UNTL, maka atuál Pró-Reitór Assuntu Kooperasaun, Professór Eduardo Aniceto Serrão ho oradór sira mai husi UNFPA ho tema “National Tranfes Account and Demographic Dividend”. Iha ne’ebé konta ho partesipasaun husi estudante sira; Fakuldade Enjeñaria I Siénsia Teknolojia, Fakuldade Siénsia Ezata, Fakuldade Ekonomia i Jestaun, no Fakuldade Siénsia Sosiál. *MG434*