Universidade Nacional Timor Lorosa’e (UNTL), liuhusi Diresaun Biblioteka Sentrál, iha ona livru 50272 maka sirkula iha biblioteka sira, konta mós ho livru 1201 ne’ebé entrega husi empreza Plural Editora-Portugal, kustu orsamentu dollar rihun haatnulu hodi dezenvolve sistema edukativu. Iha entrevista Reitór UNTL, Francisco Miguel Martins (13-02), iha INFORDEPE hateten universidade sosa livru hodi hadia no dezenvolve biblioteka atu eleva sistema edukativu ba alunu sira nu’udar futuru jerasaun Timor-Leste nian.
“Livru hirak ne’e finansia ho orsamentu mai husi STAE nia programa treinamentu ba jestaun eleitorál nian maka aloka mai universidade hodi sosa livru husi Plural Editora, maka liu iha selesaun aprovizionamentu” Fonte ne’e afirma.
Reitór rekoñese katak ho limitasaun ba edefisiu entaun UNTL koopera ho INFORDEPE hodi koloka biblioteka sentral universidade nian, maibé universidade iha biblioteka konvesionál 12 inklui biblioteka sentrál. “Aleinde biblioteka konvensionál, universidade dezenvolve hela biblioteka dijitál ne’ebé preparadu ona ho seña besik 27000 atu fasilita estudante no dosente sira maibé planu orsamentu ne’ebé tau iha Orsamentu Retifikativu (2017) la hetan aprovasaun”.
Relasiona ho assuntu ne’e, Diretór Biblioteka Sentrál-UNTL nian, José Francisco Mendes hateten livru universidade nian ho variedade oioin.
“Jestaun livru hafoin sentraliza tiha maka sei halo klasifikasaun hodi distribui ba biblioteka fakuldade atu estudante sira asesu”, Diretór mos deskreve”,
Totál husi 1201 ne’e ho variedade oioin tantu disionáriu, prontuáriu, no área espesífika maka refere ba siénsia direitu.
Universidade Nacional Timor Lorosa’e, atualmente iha biblioteka sentrál ida no biblioteka ida kada fakuldade, biblioteka Instituto Camões, biblioteka CNiC, INL, nune’e livru ho totál ne’ebé sirkula iha UNTL maka 50272 ezemplár.
Entretantu dadaun ne’e UNTL dezenvolve hela biblioteka dijitál ne’ebé fleksivel estudante ho dosente barak bele asesu ba livru ida iha tempu hanesan ho asesu ba internét maibé difikludade maka planu asaun annual 2018 no orsamentu retifikavu 2017 la hetan aprovasaun.
*MG434*