UNTL liuhusi Pró-reitoria Asuntu Kooperasaun Nasional no Internasionál agradese Estudante nain 26 no supervisor nain rua husi universidade sira (South Korea) Pacific Asia Society (PAS) despede ho estudante UNTL sira hafoin hala’o tiha mobilidade kulturál, liuhusi fahe informasaun ba malu, aprende hamutuk no harii amizade.
Iha entrevista Reitór UNTL, Francisco Miguel Martins, iha Kristu-Rei sesta-feira (19-01), hateten estudante sira mai ho proggrama mobilidade kulturál, troka hanoin relasiona ho siénsia no vizita ba fatin balun hanesan (museum, Xanane Reading Room, Kafé-Ermera).
“Kada universidade reprezenta husi estudante ida ka rua, sira mai antes pasajen tinan foun (30/12) iha Timor-Leste, i hala’o aprendizajen mutua husi ita liuliu istória ita-nia ba ukun rasik an (Muzeum), língua, dansa no seluk tan”.
Relasiona ho kooperasaun Reitór hateten UNTL asina ona Memorandum ho universidade sira balun iha Karea, no prezidente PAS nian hodi hahú programa mobilidade ne’e iha tinan liubá (2017), sei kontinua kada tinan.
Entretantu Reprezentante estudante UNTL, Elido Manuel informa katak semana rua laran sira hala’o atividade barak maibé interesante liu maka aprende troka língua estudante Korea aprende tetun no UNTL sira aprende lian Koreanu.
Enkuantu Lee Sqo OK, PAS Secretary General konsidera katak iha proggrama PAS nian ne’e maka atu halo belun ho estudante UNTL sira.
“Uluk liu ha’u la hetan informasaun kona-ba Timor no UNTL, ami hakarak halo belun ho mundu tomak, iha ne’e liuliu estudante UNTL sira, pesoalmente ha’u ho impressaun klean tebes tan haree estudante sira-nia movimentu”.
Iha semirimónia despedida ne’e, UNTL fó mós sertifikadu apresiasaun no simbolu tais no Pacific Asia Society (PAS) entrega mós sira-nia lembransa ba UNTL. Ho atividade kulturál oioin, dansa tradisionál (Korea-Timor), desportu, no tein-hahan tradisionál. *Bosco&Migy/Report*.