Universidade Nacional Timor Lorosa’e (UNTL) nia Estudante Fakuldade Direitu Dalia Maria Bianco iha Kampus sentral UNTL nian (31/01) hatete, atividade Inisiativa Kampus Seguru nian ne’ebé hala’o iha universidade di’ak, hodi bele tulun estudante sira hatene respeita malu no labele halo aktu asédiu seksuál iha resintu kampus.
“Ha’u agradese tanba Inisiativa Kampus Seguru iha universidade ne’e atu ema hotu bele iha vontade di’ak hodi aprende siénsia. Liuhusi formasaun ne’ebé oferese bele aumenta ami-nia koñesimentu atu hadok aan husi asediu seksuál no hanorin ami bele livre iha kampus hodi estudu’’, dehan Dalia.
Visereitora ba Asuntu Estudantís (VRAE) Profesora Lígia Tomás Correia, hatete iha tinan 2024 ne’e bazeia ba planu, Kampus Seguru sei kontinua la’o nafatin atu bele asegura estudante sira-nia prosesu aprendizajen.
“Ita-nia resultadu husi Kampus Seguru ne’ebé Ita hala’o kobre ona estudante, dosente, no funsionáriu hamutuk 892. Sira iha ona kompriensaun diak kona-ba prevensaun violénsia bazeia ba jéneru no prátika moris livre husi asédiu iha kampus”, tenik VRAE.
Profesora Lígia hatutan universidade servisu hamutuk ho UNwomen, Fokupers, no Rede Feto Hodi fasilita fo formasaun ba estudante, dosente no funsionáriu sira. Nune’e kria grupu traballu tékniku ba Inisiativa Kampus Seguru ne’ebé envolve estudante sira kada fakuldade hodi aseguru ambiente estudu ne’ebé konfortavél, amigavél.
#TimorLeste #UNTL #VRAE 2 Fevereiru 2024
Média UNTL 📝: Laurindo da Cruz Gomes
Foto 📷: Laurindo da Cruz Gomes